شاعرية عذبة ولغة أعذب ومعانٍ راقية لشاعر فرض نفسه على ساحة الشعر الخليجي
٠٠٠٠٠٠٠
ياذيب يا اللي على حيد الثلايّم عوى
احرص على سمعتك دامك كسبت احترام
ترى الذيابه سوى والناس ماهي سوى
تعامل بقدرتك قدام قدرك يضام
تدارس الناس قبل تذوق حرق الجوى
ترى بعضهم ردي قليل منهم تمام
واللي يبيعون في سوق الكلام الخوا
مكسبهم الهون بين الناس والإتهام
القول لو ماتوافق بالفعايل ذوى
ويلّحق اللي حكى به في الخلايق ملام
بعض السوالف مرض لكن بعضها دوا
وأنا من اللي يجيدون الفعل والكلام
وأعوذ بالله من قول ً بلا محتوى
يسلّم القاع رجل ً كان يرعى الغمام
أما العلاقات ماتثبت على مستوى
قليل تبدا بسلام وتنتهي ياسلام
بعض السفن تبحر ويكشف رداها الهوا
ماودها بالغرق ويعوقها الاصطدام
ياذيب من يارد العد القراح ارتوى
واللي شرابه هماج شلون عينه تنام
للجندي احيان رزق يفوق رزق اللوا
لاصار رزقه حلال وذاك رزقه حرام
تقنّص الخير ولكل امرئٍ مانوا
أمّا المناصب مقسمها إله الأنام
ياذيب وان كنت بالوادي المقدس طوى
لاتخلع النعل مانتب للخلايق إمام
خالد عبدالرحمن السبيعي
