ماينحني لي راس وآنا سعودي
يوسف محمد الحربي
ماينحني لي راس وآنا سعودي
فضلٍ من الله عندنا خير حكّام
يا اجمل وطن في كل عامٍ تزودي
بين الدول تعيش قدام وامام
أول مع معزي عريب الجدودي
أسس لنا تاريخ فوق السحب هام
واليوم مع سلمان صرنا نسودي
هذي حقيقة ماهي أضغاث أحلام
واميرنا محمد علينا يجودي
قائد محنّك مُلهم أمير مقدام
له رؤيةٍ يغتاض منها الحسودي
كنّه يجمّع عدّة أعوام في عام
في سلم أمجاده تغنّى صعودي
يشهد له العالم على مر الايام
من قمّة لقمّة مايعرف حدودي
لو للقمم اخطام بيديه الاخطام
اليوم ياتاريخ جا من يعودي
عليك بامجادٍ تسطرها الاقلام
حنا معك ياسيّدي في سنودي
حنا معك قدام قدام قدام
شاعر سعودي
