مصافحة اولى
…..
….
…
..
.
أخيل برقٍ ما توكّدت أراضيه
والراعدي شق الليالي وله دو
والوادي اللي أعرفه قبل وأمشيه
ما عاد لي حولٍ لمشيه ولا قو
حتى الضواري كنها ما مشت فيه
وذيابته ما عادي أسمع لها عو
مات الطريق وكل ذكراي ترثيه
والخطوه اللي ما نشف وطيها تو
عاشت يتيمه بين غالي ومغليه
ما غير تجرع من ثرى أرضها خو
في حروة الطرقي ليا حط رجليه
تنشد وصوله : كيف مسراك والجو ؟!
جاكم مطر يسقي غيابي ويرويه ؟
والا على خبري غيابي بلا نو
حتى المسافة تايهه في ثنا التيه
والأرض جدبا كنها منبت السو
ترقب على رجم المحاني مواريه
ما بان غير اليأس من بعده الهو
لا هو وصل وسمه ولا حل طاريه
والبرد يشعل داخل اليأس له ضو
