قصيدة بنكهة الهيل والزعفران للهيلا شاعرة تكتب بطريقة مختلفة عن السائد وبشاعرية فذة تلتقط التفاصيل الدقيقة.
٠٠٠٠٠٠٠٠٠٠
خلاص ابحرت في عالم بحرك وجيت بالمنتوج
بلامس قلبك المرهف ،،، وما في خاطرك ،، بده
خلقني خالقي انثى ، نمت بين الضلوع العوج
ونيسه لك ،،، وابدد حزنك اللي بالغٍ حده
جميع الكون ما يغنيك عني لو قطعت فجوج
ولا يغنيك عن همسي لا هزلي ولا جده
انا رحمه من الله لك بحب وسالفه وغنوج
وانا أمك وانا اختك وبنتك والغلا سده
اذا أمك ،،،، أبي برّك يطمن قلبي المزعوج
وابي عطفك وابي ودك ترى الجنّة تبي عده
وإذا أختك ،، أبي وصلك ترى يلحق عليّ الحوج
اذا شفتك ،،، فرح قلبي و ضمك حيل و ابشده
وإذا بنتك ،، فانا درة بحر وانت البحر والموج
انا دانة ثمينه وانت ابوي الصايغ و يده
واذا زوجي ،، فانا لك زوجةٍ تحفظ حقوق الزوج
انا لبسك ، وانا عطرك وانا عودك وانا نده
انا لك خل قلبك صادقٍ لي بالوفاء ممزوج
وانا شيهانه بكفك تنومس ساعة الهده
ســـألت الله يفتح كل بابٍ مغلقٍ مزلوج
ويجمعنا على خيرٍ بوسط مروج ممتده
دخيلك لا تخليني ،، على ميناء بحرك ادوج
أخاف البحر يغرقني بموجه لا طغى مده
شيخة الهيلا
بهذه الشاعرة وأمثالها نفخر وتفخر الساحة الأدبية وتستحق النشر والإشادة .