( لمّة أصحاب )
……..
لمّة أصحاب
ضحك ووناسة أحباب..
هناك اللي محتار أشغلته الدنيا ومشاكلها ، يشكي على مهموم مُثقل بمسؤليات كثار ..
والثاني ثرثار ، يسرد اللي صار متنبأ باللي ماصار ..
وناعم متأنق رافع جوال ، في فلكة يسبح ، يستشير اللي جنبه ؛ عن هذا الفلتر اللي يعجب ، شور عليه يا مستشار ..
وصراخ بآخر الجلسة وعناد ، عن مذاق وطعم الحلى هذا ولا ذاك الحلو بمرار ..
ووصول متأخر لفاكهة الجلسة حبيب الكل ، مع تهليل وترحاب..
والأغاني تضرب بعالي الصوت
مابين موضي ومحمد عبده وأبو بكر سالم المحضار ..
ودروس الرقص مع المحترفين الشطار..
في منتصف الجلسة تحدي الكبار ، ورق بلوت وكيرم ، وكم صورة لهم تذكار ..
وصاحب اللمة مشغول
يجهّز أطباق المكرونة والزربيان والمقبلات والسلطة الخضار ..
نقاش أحتدم بين اثنين بينهم
عتب ولوم أحباب ، وشوية مواقف تحتاج لتصفية حساب..
وهناك الغائب عن الجمعة مابين مسافر ومشغول بعمل وبعيد عن المضمار…
جلسة فضفضة وضحك وثرثرة ومزاح وطرب ورقص ولعب وعناد وعتاب..
وأنا مابين أسمع ذا وأضحك مع ذاك
وأهدي النقاش وأختار الأغاني
وأشجع اللعب مع الكبار ..
وأسأل الأكل جاهز على السفرة
ولا أروّح ناوية بصيام..
الحكاية كلها لمة أحباب وأصحاب
متفاوتين بالعمر والفكر والاهتمام..
مرة متفقين وكثير مختلفين وأحياناً متخاصمين ، وفي لحظة عاشقين على قلب واحد متعاطفين ، يجمعهم حب أخوي..
يابختهم الداخل بينهم خسران..
………
