الشاعر / فهد عبدالله الحربي
لو كل كلمه ضيقت صدر رجال
وبيّح بأثرها كل ماكان خافي
كان المجالس روّحت مثل الأطلال
نبكي عليها تحت ردم السوافي
ولادارت الدله ولا سيق فنجال
فيها وصار وجارنا اليوم طافي
مايدمح الزلات ياكود الأبطال
والا الردي من شان زله يجافي
المرجله ماهي بمنصب ولامال
بالحلم الأحنف ساد والحلم كافي
عزالله انه سيد لكل الافعال
الطيبات اللي بها العز ضافي
والعفو شيمه انحرم منها الانذال
مايقدرون العفو ناسٍ ضعافي
اشمخ عن الزلات ياطيب الفال
وارفع سموك عن قدر كل هافي
حتى مجالسنا تعمر للاجيال
ويروى لهم درسٍ بالاخلاق وافي
ونعيش بالدنيا وحنا على وصال
ولا انتفرق في دروب التجافي
ترى طراة العمر في كل الاحوال
لحظة تجمع للقلوب النظافي
والعبد عن دنياه ماشي ورحال
اما ركب والا على الرجل حافي
في لحظةٍ فيها يمرن الاهوال
يشيب راس الورع مما يشافي
في حفرةٍ لا عم فيها ولا خال
ولا اتجمع بالقبور الولافي
يردم عليه تراب فيها وينهال
ولا للجسد فيها فراش ولحافي
فيها حصاد العمر من كل الاعمال
ماقدم المخلوق يلقاه وافي
اما لجنة وارفه ظلٍ وظلال
والا لنارٍ تطلع بالخوافي
