غربة الشاعر
نص شعري عميق يجسد معاناة شعر يقدم تجربته الانسانية بكل عفوية وتجرد
٠٠٠٠٠٠٠٠٠
الله يبيح الدجا من غربة الشاعر
سود الليال اتعبت جوفه ومحبرته
لا نام طرفه ولا طرف الخلي ساهر
كم ليلةٍ وقْفت القيفان وعسرته
صدره ملته الهموم وقلبه يكابر
والمشكله مالقت له باب وكسرته
غير الورق والقلم ربانه الماهر
وهموم من كثرها يصبح ولا عبرته
يقضي نهاره وهو بالفرح متظاهر
والياضواه المسا واحزانه انثرته
له جرح مثل المدى لا اول ولا اخر
لو ضمته هالضلوع العوج ماسترته
اعطت يدينه ولا هو بالعطا ذاخر
قلوب تحفظ جزاه وذيك منكرته
ولاهو على مالقى بالناس متخاسر
كل ما احذفوه بحصاه يجُود ب ثمرته
يكفيه قلبٍ مثل لون البرد طاهر
وش ياخذ الادمي وان راح لاخرته
الادمي وان تكبّر عاد وش خابر
غير الفنا والكفن والقبر وغبرته
عبيد الدبيسي
